Бүгінде Қазақстанның Еуропадағы
Қауіпсіздік және ынтымақтастық жөніндегі ұйымына 2010 жылы төрағалық
етуі қоғамда кеңінен талқыға түскен мәселелердің бірі саналады.
Қазақстан Республикасының Президенті Н.Ә. Назарбаев «Қазақстан ЕҚЫҰ
барлық институттарының нығаюына, сондай-ақ елдің саяси жүйесінің
демократиялану бағытын жалғастыруға барынша күш салады» деп атап өткен
болатын. Әрине, бұл орайда «Қазақстан қоғамы халықаралық деңгейде
шешуші рөл атқаратын осынау саяси қадамды қалай бағалауда, осынау үдеріс
бұқарадан не күтеді және керісінше, әлеуметтік қауым бұл қадамға өз
үлестерін қосуға дайын ба?» деген сауалдардың да күн тәртібінде тұрғаны
жасырын емес. Қалай десе де, аталмыш құрылым Еуропадағы Қауіпсіздік және
ынтымақтастық жөніндегі ұйымы құрамына кіретін 56 мемлекеттің
тұрақтылығы, демократиялық дамуы, қауіпсіздігі және өркендеуі үшін жұмыс
істеуде. Ол ортақ құндылықтар мәселелері бойынша саяси сұхбат жүргізіп,
дамуға бағытталған тәжірибені енгізеді.
Әріден айтар
болсақ, бір бұл ғана емес, «әлемдегі Біріккен Ұлттар Ұйымымен қатар
мүше-мемлекеттердің тұрақтылығы мен қауіпсіздігі, демократиялық
құндылықтар мен өркениет дамуы жолында белсенді қызмет атқарып келе
жатқан ұйымға Қазақстанның төрағалық етуі халықаралық қауымдастыққа
қандай өзгерістер әкеледі және еліміздің дамуында қандай ықпалы болмақ»
деген сауалдар төңірегінде қызу пікірталас өрбіп отыр.
Қазақстан Республикасы Мәдениет және ақпарат министрлігінің әлеуметтік
маңызды жобасы аясында 2008-2009 жылдары аралығында «Әріптес» үкіметтік
емес ұйымдардың конфедерациясы қолдауымен «Қазақстанның ЕҚЫҰ-ға
төрағалық етуі: елдегі жүргізіліп жатқан реформалардың азаматтық қоғам
институттарының рөлін арттыруда» бағдарламасы жүзеге асты.
Жоба аясындағы әлеуметтік зерттеулер Оңтүстік Қазақстан, Жамбыл,
Қызылорда және Алматы облыстарында жүргізілді. Зерттеуге барлығы 1000
респондент қатысты. Аталған аймақ тұрғындары арасында Қазақстанның 2010
жылы ЕҚЫҰ-ға төрағалық ету мемлекеттік саясатын түсіндіру және осы
бағытта өткізілетін шаралар жайлы кепілдемелер дайындау көзделген
болатын.
Қоғамдық пікірді айқындауға бағытталған әлеуметтік зерттеулер
Қазақстанның төрағалық етуі қарсаңында аймақтардың әлеуметтік-саяси
дамуын сараптауға бағытталды.
Зерттеу ақпараттық үдерістерді сараптауға, Қазақстан Республикасындағы
демократиялық институттардың дамуына, құқықтық мемлекеттің қалыптасу
және даму мәселелеріне, адам құқын қорғау мәселелеріне, қоғамның түрлі
салаларында Қазақстан Республикасы дамуының басым бағыттары бойынша
жүргізілді.
Қазақстан Республикасындағы демократиялық институттардың дамуына
байланысты қойылған сауалнамаға қазақстандықтардың 61,5%-ы «Бірқатар
проблемаларға қарамастан демократиялық жүйе мемлекеттік басқарудың үздік
жүйесі саналады» деп атап көрсетеді. Қоғамдық пікір көрсеткендей,
демократия бейнесі былай көрініс тапты: сұрау салғандардың 4/3 астамы
демократия қазіргі заманғы Қазақстанның мемлекеттік құрылымының
анағұрлым тиімді де бірден-бір жолы екендігін атап өтеді.
Сауалнама нәтижелерінен байқалғандай, демократияны оң бағалау сұраудың
алғашқы екі нұсқасында тең келіп отыр. Яғни қазақстандықтардың 64,6%-ы
демократиялық институттардың дамуына бағытталған мемлекеттік
бағдарламаларға оң көзқараста екен. Ал сауалнамаға қатысқандардың 2,9%-ы
сыни пікір айтпауы азаматтық ұстанымының әлсіздігі мен демократия және
оның ұстанымдары жайлы хабарсыздығын дәлелдесе керек (кестеде).
Дегенмен бұл аталған көзқарас шешуші рөл атқармайды. Қазақстан
тұрғындарының басым көпшілігі «демократия – қазіргі заманғы Қазақстан
үшін басқарудың бірден-бір не анағұрлым тиімді жолы» деп санайды.
Зерттеу барысында демократия дамуын 10 балдық деңгейде бағалау тәсілі
қолданылды. «10» балл – толық демократиядан «1» – диктатураға дейін.
Жалпы алғанда, Қазақстандағы демократия деңгейін респонденттер 5,3 балл
деп бағалады. Сонымен демократиялық үдерістердің нәтижелеріне аса
разылық танытпағанымен, демократия идеалдарына деген аса ерекше
көңілтолмаушылық респонденттерден байқала қоймады.
Әдістемелік тұрғыдан алғанда, аталған нәтижелер түпкілікті бір жақты
саналмайды әрі алдағы уақытта бұл бағыттағы бағалаудың өзгеру сипатын
ескеру қажет. 1 – диктатура деңгейін респонденттердің тек 1,8%-ы
ұстанса, ал 10 – демократия ұстанымын 5,1%-ы атап өтеді. Бұл аса үлкен
көрсеткіш саналмағанымен, мардымсыз болса да жоғары балдың бағалануы –
жағымды үрдіс саналса керек.
Демократияның басты ұстанымы – халық не оның басым бөлігінің билігі.
Қазақстандағы демократиялық үдерістердің мәнін айқындауда қоғамдық
пікір маңызды саналмақ. Сауалнама нәтижесінен айқындалғаны,
еліміздегі демократиялық институттардың біртіндеп қалыптасып,
нығаюында. Бұған еліміз халық еркіне қарай басқарылады деген жауаптарға
оң не осы ұстанымдағы жауаптарды респонденттердің 41%-ы таңдауы дәлел
болса керек.
Қоғамның демократиялануы құқықтық қоғам дамуынсыз, азаматтардың
құқықтық белсенділігі артуынсыз мүмкін болмасы анық. Құқықтық мемлекет
ұстанымының сақталуы – тұрақтылық, қалыпты даму, қоғамның
қалыптасуындағы жетістіктердің нығаюының кепілі. Әлеуметтік тәртіптің
тұрақтылығы – әлеуметтік қауымдастықтың қалыпты өмір сүруінің қажетті
шарты. Қазіргі заманғы жылдам өзгерістер әлемінде тұрақтылық дербес
құндылық саналып қана қоймастан, ұйымдастырушылық сипат алуда. Құқықтық
мемлекеттің даму және қалыптасу мәселелері қоғамдық пікірді айқындау
зерттеудің екінші бағыты саналды. Зерттеуге қатысқан қазақстандықтардың
69,2%-ы Қазақстанның қазіргі даму кезеңін «құқықтық мемлекет ретінде
дамуда» деген көзқараста.
Қазақстан Республикасындағы әрекеттегі құқық қорғауды бағалау
сипаттамасы мынадай: 48,7 % – күнделікті өмірде құқықтық мемлекеттің
дамуына куә; 65,4% – тұрғындардың құқықтық сауаттылығының арту үрдісі
байқалуда деп санайды. Ал сауалнамаға қатысқан респонденттердің 3/1-і
Қазақстанда әкімшілік еркіндіктің нығаю үрдісі байқалуда деген
көзқараста.
Респонденттердің үштен бір бөлігі 38,4% оң өзгерістер болуда, ал
42,3%-ы болып жатқан өзгерістер тұрғындарға кейде оң, кейде теріс әсер
етуде деп бағаласа, қалған 7,6%-ы өзгерістер халықтың басым бөлігін
қамтыған жоқ деген пікірде. Олардың 11,5%-ы өзіндік ұстанымын
танытпастан жауап қатпаған. Дегенмен алдағы уақытта Қазақстан
дамуында құқықтық мемлекеттің өркендеуі жағымды сипат алуы тиіс
мәселелер қатарында деген болжамға келуге болады.
Моральдық еркіндік пен адам құқын қорғау қоғам дамуындағы ең қарапайым
да күрделі мәселелер қатарында. Жалпы, адам құқын қорғау мәселесі
көптеген елдердің Конституциясында, түрлі әлеуметтік-саяси
бағдарламаларда, жобаларда, сондай-ақ Қазақстанда да қабылданған
бірқатар халықаралық келісімдер мен декларацияларда бекітілген.
Дегенмен адам құқығы мәселесі қашан да күрделі мәселелер қатарында.
Азаматтардың құқы мен бостандығы өзара байланысты көптеген әлеуметтік
факторларға қатысты айқындалады. Осы проблеманы қоғамдық пікір
үдерісінде қарастыру үшін респонденттерге Қазақстандағы саяси құқық пен
азаматтық бостандық деңгейін 1-ден 7-ге дейін бағалау ұсынылды.
Сараптау барысында алынған нәтижелер еліміздегі саяси құқық,
азаматтық бостандықтың жүзеге асу деңгейі орташа 4,1% балды құрады. Яғни
бұл көрсеткіш ортадан жоғары (кестеде).
Адам құқығын қамтамасыз ету мәселесі зерттеуде көрсетілгендей,
Қазақстанда аталған құқықтар толықтай жүзеге асқанымен, оның деңгейі
әрқилы. Респонденттер елімізде адамдардың мәдени құқығы толықтай, ал
қалған құқықтары ішінара қорғалады деп санайды.
Ақпараттық үдерістерді сараптауда маңызды саналатын «сөз бостандығы»
құқығын айқындау жүргізілген зерттеудің басты бағытының бірінен
саналды. «Сөз бостандығы» құқығы демократиялық қоғам дамуының маңызды
параметрі ретінде айқындалады. Еліміздегі «сөз бостандығы» құқығының
жүзеге асу деңгейін респонденттер 74,3% деп бағалады. Бұл Қазақстандағы
сөз бостандығы құқығының орындалу деңгейін айқындайды. Адамның сөз
бостандығы құқының жүзеге асуы мен азаматтардың бұқаралық ақпарат
құралдарына сенім деңгейі арасында нақты тәуелділік бар. Қазақстандық
медиакеңістіктегі ақпараттың шынайылық деңгейін бағалауда сауалнама
нәтижелері былай сипат алды:
– сұрау салғандардың 41%-ы БАҚ республика өміріндегі таңдаулы оқиғаларды ғана жариялайды деп санайды;
– респонденттердің 26,9%-ы БАҚ-қа келіп түскен ақпараттарды өз бетінше сараптауға және салыстыруға ұмтылады;
– 15,3% – көптеген БАҚ саяси топтардың мүддесіне орай ақпаратты боямалайды деп санайды;
– 12,83% – қазақстандық БАҚ-тағы ақпарат толықтай шынайы деп санайды.
Зерттеу аясында ақпараттық мәселелерге байланысты пікірді
айқындауда мемлекеттік телеарналар негізінде қоғамдық телеарна құру
мәселесі қарастырылды. Қоғамдық телевизия құру мүмкіндігін
респонденттердің көпшілігі (75,5%) қажет деп санайды. Әрі бұл арна
ақпаратты алудың балама көзі бола отырып, азаматтардың сенімді,
объективтік әрі дер кезінде ақпарат алу құқын қамтамасыз етер еді деп
санайды.
Қазақстанның ЕҚЫҰ-ға төрағалық етуі бұқараға қаншалықты белгілі
екендігін айқындау – зерттеудің негізгі бағыты саналды. Зерттеу
нәтижесінен байқалғандай, респонденттердің басым бөлігі мәселенің БАҚ-та
кеңінен жарияланғанын және мәселеден хабардар болғандығын білдірді.
Және де мақсатты аудитория бұл тақырыпқа келгенде аса белсенділік
танытып отыр. Тек респонденттердің 16 пайызы бұл туралы алғаш естігенін,
БАҚ-та жарияланбағанын, жауап беруге қиналғандарын атап өтеді (Б
қосымшасы, 15 сурет).
Қоғамдық пікір тарапынан Қазақстандағы азаматтық қоғам мен саяси
институттардың дамуын ынталандыру бастамаларының перспективалық
бағыттары айқындалды. Азаматтық және саяси институтты дамыту шараларын
былайша сипаттауға болады:
– Адам құқығының қорғалуын бақылау күшейді – 41%;
– ҮЕҰ дамуы – 32,1%;
– Жергілікті өзін-өзі басқарудың дамуы – 26,9%;
– Ақпараттық кеңістіктің кеңеюі – 12,8%;
– Ұлттық мәдени орталықтардың дамуы – 7,6%;
– Көші-қон саясаты – 2,5%.
Республикадағы саяси үрдістердегі оң өзгерістер адам құқының қорғалуын
бақылау мен үкіметтік емес ұйымдардың белсенді дамуымен, келесі
кезекте ақпараттық кеңістіктің, сондай-ақ жергілікті өзін-өзі
басқарудың дамуымен айқындалып отыр.
Зерттеу нәтижесінде әлеуметтік-саяси мәселелердің өзектілігі мен оларды
қоғамдық пікір тарапынан шешу қажеттілігі айқындалды.
Әлеуметтік-экономикалық проблемалардың басымдықтары былайша сипат
алды: алдыңғы үштікте – кедейлікті жою, экологиялық қауіпсіздік,
есірткі бизнесі мен наркотрафикпен күрес мәселесі аталды. Қалған, шешімі
күттірмес әлеуметтік-саяси мәселелер қатарында – тұлғалардың құқығы мен
бостандығын қамтамасыз ету, демократияның дамуы, жемқорлықпен күрес
саналды. Әсіресе, республиканың түрлі аймақтарындағы респонденттер
жемқорлық өткір әлеуметтік-саяси проблема әрі оны жедел түрде шешу қажет
деп санайды.
ЕҚЫҰ-ның қызметі аясына енетін халықаралық міндеттерінің Қазақстан үшін
маңыздысы – адам құқын қорғау, экономикалық және экологиялық
қауіпсіздік, қақтығыстардың алдын алу жөніндегі дипломатиялық ұмтылысы,
сенімді қарым-қатынастарға жету мен қауіпсіздік жөніндегі шаралар,
қаруланудың таралуын бақылау деп нақтылайды қоғамдық пікір.
ЕҚЫҰ жетекшілерінің бірі А.Стубб мырза ҚР Президенті Н.Ә.Назарбаевпен
кездесу нәтижесіндегі брифингте «Қазақстанның 2010 жылы ЕҚЫҰ-ға
төрағалық етуі – тарихи және символикалық маңызы бар мүмкіндіктер.
Өйткені бұл кезеңде ЕҚЫҰ құрылғанына 35 жыл толады әрі Қазақстан Орталық
Азиядағы Еуропадағы Қауіпсіздік және ынтымақтастық ұйымына төрағалық
етуші ең алғашқы ел саналып отыр. Бұл – ЕҚЫҰ мен Қазақстан тарихына
жазылатын жаңа беттер» деп атап өткен болатын.
ЕҚЫҰ мен Қазақстанның жаңа тарихының жаңа беттері енді басталды.
Төрағалық ететін шешуші жыл ағынындамыз. Қазақстан үшін де, халықаралық
қауымдастық үшін де маңызды жаһандық оқиғалардың қатарында орын алған
бұл кезең ел ішіндегі қарапайым азаматтардың қоғамдағы азаматтық
ұстанымының нығаюына, саяси мәдениеті мен белсенділігінің артуына
тікелей ықпал етерлік оқиға ретінде өрбуі тиіс.
Қоғамдық пікір демократиялық құндылықтарға жетудің кепілі саналатыны
рас. Өйткені демократиялық қоғам қалыптасуында бұқараның билікке ықпалы,
саяси шешімдерге қатысуы, саяси үдерістерге белсене қатысуы, азаматтық
ұстанымдарын танытуы маңызды.
|